بقلم نون السعدي

تعا نتلاقى ونحنا صغار

نتخبى بخيال الوقت

هاك الوقت

الوقت لـ كنا فيو صغار

ونحلف إنو شو ما صار

نضل صغار .. كل الوقت

تعا تنمحي هالمشوار

لـِ مشيناه تـ صرنا كبار

نعربش بريت هالعتمي

نخربش ع وج العمر

نلملم كل الضحكات

لـِـ ضحكناها بهاك الوقت

ونطرطش بهالضحكات

نضْحكهم بأعلى صوت

مش عالسكت

تعا نتولدن .. نتشاقى

نتزعرن ع سطوح الدار

نلعب لعبة بيت بيوت

وناكل أتلي ونتوجع ..

نبوس التوبة بس نرجع ..

إنو نسينا ونتربع

بخيال الوقت

كل الوقت

ونحلف إنو شو ما صار

نضل صغار

ونضل صغار